الحب ماهوش كلام تقوليهلي بفمك .

الحب ماهوش كلام تقوليهلي بفمك .
ولا حروف وقلوب ترسميهملي في البرية

أنا خلاص كرهت ومليت من غرامك
غير انساي عنواني ديري مزية

.رجعت نحشم حين يجيني جوابك
نحشم حين نشوف الفاكتور يشوف فيا

حتى الفاكتور عرف اللي بيني وبينك
و قصتي معاك راها رجعت في البوسطة حكاية

هذا شحال و انا محقور في عشقك
طايح بقلبي وعايش معيشت النوايا

شحال من ليلة جبتها سهران مع خيالك
غير أنا و الشمعة نخايلك جالسة حذايا

انا صح كنت عايش غلطان في غرامك
لكن ربي منين راد وقدر راني فطنت من لعمية

منين صحيت عولت ننسى اللي بيني و بينك
القلب اللي تفكرك نكويه بميات كية

الحمد لله اللي عرفت قدري وقدرك
عرفتك ما تبغينيش غير تكذبي عليا

ديما تدعيلي بالغرام في كلامك
تقوليلي انت في البال الصباح و لعشية

تقوليلي لو نقدر بالدموع نكتبلك
و بدموع القلب اللي راني نكتبلك في البرية

تقوليلي لو كان كشما يصرالك
يهون لعمر من بعدك و مانبقاش حية

تقوليلي نضحي بالكل على جالك
المهم انت قدر ضروفي وشوف ليا

أنا هذا الكلام كل سمعتوا منك
لكن مازال معرفتش محبتك وين هي

المرا اللي تقول لحبيبها نحبك
على الأقل تبين وتضحي شوية

ان انتي ماشفت حتى تضحية منك
محروم حتى باش نشوفك في جلسة حذايا

هذا شحال و انا متمني نشوفك
هدرت وغنيت و مافهمتيش معنى غنايا

الحب عمروا ماكان كلام تقوليهلي بفمك
ولا حروف وقلوب ترسميهملي في البرية

أنا خلاص كرهت ومليت من غرامك
غير انساي عنواني ديري مزية

نبغيك يا حبيبي و نموت على جالك
هاذي الكلمة شحال من مرة كتبتيهالي

اللي نية حين يقرا كلامك
يظن بلي صح المسكين تموتي على جالي

لكن الحب اللي بريء منك
الحب عند اللي عرفوا في الشان غالي

الحب بكى عيطة عباد قبلي و قبلك
حتى الابطال و دموعهم سالت كي لحمالي

أنا نظن ماطلبتش الموحال منك
طلبت غير نشوفك لحظة قبالي

لكن تحيرت و حيرني جوابك
الكلام اللي قلتيهلي يبقى ديما في بالي

الحمد لله اللي عرفت شحال سويت عندك .
و من حقي على هذا الشيء نشكر ربي العالي

يا غلطانة ماتزيديش تقوليلي نحبك
لو كان حبيتيني راكي حسيتي بحالي

لو كان حبيتيني راكي جيتي لعندي نشوفك
لكن انا مانستاهلش باش توقفي قبالي

انا نسوى غير حروف تكتبيهملي بيدك
أنت راقدا متهنيا و انا نبكي في الليالي

شحال من عاشق راهوا في عشقو حيران
و عايش بحال الطير اللي مكسر من جنحيه

يبات مع نجوم الليالي سهران
طول الليل يبكي و الدمعة في عينيه

كل صباح يصبح في حالوا قلقان
يصبح في البكرة يستنى في برية الحب الجيه

راه عايش المسكين في عشقوا غلطان
ومن غير الفاكتور ماكانش اللي يفرج عليه
غير اسمعلي و فيق لروحك يا غفلان
أنت نية و اللي نية لازمني نوصيه

رد بالك الدير في عشق النساء لامان
شحال من مارق في العشق تقود من الوذنين

كاين بعض النساء يغيبوها للشيطان
الكذب التنوفيق القلب الرحمة مافيه

جربت و شفت لعجب في هذا الزمان
سيف الدين صغير ومليون محنة عدات عليه

لكن ربي كان معايا سترني من لغبان
ربي مول نية منكم اللفع ينجيه

و زاد سلحني بعقل كل شيء بالميزان
اللي في راسي نقولوا واحد ماعلابالي بيه

راه جاي نهار اللي فيه الصح يبان
أما اليوم الحق اتحقر غابوا عليه ماليه

الحق اليوم راهم بلعوا عليه البيبان
لكن مابقاش انشاء الله وشانوا يرجع ليه

يومها يفيق جميع من كان داير في العقرب لامان
و اللي مافاقش راه يفيق نهار اللي تكويه

الحب الصافي يا خاوتي في الدنيا لازملوا برهان
حتى المراة ولازمها تضحي على اللي تبغيه

الحب يا خاوتي من بكري غالي في الشان
و بزاف الغالطين ما عرفوش معانيه

بغاو يسجنوه في البرية و العنوان
الجهال اليوم بغاو يديروا حصار عليه

ماتزيدوش تتكلموا على الحب يا خيان
الحب غالي ما كانش فيكم اللي يقدر يشريه



الحب فارس ماهوش مثل الفرسان

راكب فوق جواد و مغمض من عينيه



ما يعترف بحتى اشارة يلقاها في الطرقان

كي الريح اللي لقاه في طريقو يديه



معروف من بكري مريض بمرض النسيان

و ماكان لا طبيب ولا طالب اللي قدر يداويه



ما يرفدش الباسبور كي يدخل في الاوطان

ما عندو حتى قانون في الدنيا يعترف بيه

هذا هو الحب يا اللي راك في حبك غلطان

و عشق بلا تضحية من بالك غير ارميه



اللي قالتلك نبغيك لازملها بيان

الحق كي يظهر الباطل يهرب و يخليه



و المرا اللي بغات تكسب بطل من الشجعان

غير تكون صافية وتعرف كيف تربيه



بزاف اللي يحسبوا فيا عدو للنسوان

غير تهموني سيف من بكري هذا الشيء خاطيه



أنا المرا نمثلها الوردة في بستان

وانا الورد لو جيت نقدر بدموعي نسقيه



لكن الكذب و النفاق هوما اللي عندي عديان

و العبد الخداع مرا ولا راجل نعاديه


نهدر في كلام ماني شاعر ماني فنان

اللي في راسي نقولو واحد ما علابالي بيه



نكره النفاق و الكذب حتى في السلطان

و العبد الصافي ككيما كان حالوا نبغيه



وشحال من عاشق راهوا في عشقو حيران
و عايش بحال الطير اللي مكسر من جنحيه

يبات مع نجوم الليالي سهران
طول الليل يبكي و الدمعة في عينيه